ديـوان " قصائد نبطيه " - للشاعر خالد الفيصل } .. ~

بسم الله الرحمن الرحيم ..
والصلاه والسلام على نبينا محمد وعلى آله وصحبه اجمعين..
السلام عليكم ورحمه الله وبركاته ..

الشعر له مكانه في حياتي وفي قلبي .. ونادر مايوجد في هذا الوقت
شعراء ! "اغلب" اللي فالـ الساحه- اشباه- شعراء ..
راح زمن الشعر الشعبي واصبح في انحدار- للاسف الشديد-
راح اذكر اسامي أساطير الشعر الشعبي امثال( حميدان الشويعر-
محسن الهزاني- محمد بن لعبون- تركي بن حميد" شيخ عتيبه"-
راكان بن حثلين- محمد الاحمد السديري- والكثير من الشعراء)
كلهم أعلام من الشعر الشعبي .. وأساطير بـ حق:
وكل واحد والله لو نفتح له موقع ونكتب عنه دواوين ما كفاه حقه..
الله يرحم من مات منهم ويغمد روحه الجنه ويطول بـ اعمار الحي منهم ويرزقهم الصحه والعافيه..

من أحد اساطير هذا الشعر الشعبي .. اطلق عليه لقب" امير النبطي"- يعني الشعبي-..
وهو يستاهل اللقب ولا احد ينكر هالشي ..
شاعر .. يكتب الحرف بـ كل إبداع واحساس!..
رسّام .. يقصد و- يرسم- في قلوب العشّاق:!..
شاعر له تاريخ طويل في المجال الغنائي .. اذا" تـغـنـّت " له قصيده فـ راح تلاقي النجاح !..
هو التوأم الروحي للمطرب" فنان العرب" محمد عبده!..
بعد الكلام اللي فوق اكيد عرفتوا مين اقصد ..




الامير/ خالد الفيصل " دايم السيف"

][ نـبـذه بـسـيــطـه عـن سـمـوهـ][
وأنا لي من بغيت أمرٍ عطيته
جميع حقوقه وطرّبت راسي

حلاوة العمــر تلحق ما تريـد
هـو يأتي ليّن ما كان قاســي

- ولد عام 1940" تقريبا ً 68 سنه " الله يطول بعمره .

- الامير الـ" 271 " لـ مكه المكرمه من يوم فتحها الرسول- صلى الله عليه وسلم-

- عن بداياته فـ يقول طويل العمر ان اخوه" عبدالله" هو استاذه .


يقول عنه :
يا سيدي يا خوي يا أستاذ عمري
علمتني وزن الحكي قبل الأشعار

- بدأ في كتابه الشعر وعمره 14 سنه يوم كان فالطايف .

- متأثر في الشاعر المتنبي .

- يحب عمـّه سلطان بن عبدالعزيز .. ويعتبره ابوه وصديقه .

يقول عنه :
أفاخر بعمي على الناس واثني
ويستاهل البيضا سلايل كحيلان

- تزوج وعمره 25 سنه .. عنده 3 عيال ..
بندر وسلطان وسعود .. ولولوه ماتت وعمرها 3 سنين:

- فنان تشكيلي" رسـام" .

- اول شاعر شعبي تقام له امسيه فالمقر الادبي فالرياض .

- اول شاعر شعبي تقام له امسيه فالقاهره .

- اول شاعر شعبي تقام له امسيه في لندن .

- اول شاعر شعبي تقام له امسيه في واشنطن .




][ اقـــوالـــــه][

قال عن أبها :
" لأبها القديمة في نفسي مذاق فطري لا يقل متعة عن مذاق أبها الحاضرة..
جئتها قبل ربع قرن بحكم العمل وسرعان ما أسرني جمال طبيعتها،
وطيب عشرة أهلـها، فتحولت علاقة العمل إلى علاقة قلبية..
أعطيتها عن طيب خاطر فبادلتني العطاء وفاءً وإلـهاماً.. وهي في قصيدتي
ولوحاتي كما هي في قلبي تعبير عن الحب المتبادل "

ويقول عن الفن :
" الفن في حياة الشعوب قلبها النابض بالحياة،
والمرآة التي تعكس تكوينها الداخلي وتشكّلـها
الوجداني، وهو كذلك لأنه من أكثر الممارسات الإنسانية ارتباطاً بالمشاعر والعواطف،
ومن ألصقها بالأحاسيس المرهفة للنفس البشرية. وقد كان الفن
على مدى العصور من أصدق وسائل التعبيرعن حياة الأمم، ومقياساً دقيقاً
لدرجة رقيِّها وتحضرها"

قال عن علاقته بـ الشعر بـ حكم انه امير :
" قد يقول قائل وما للأمير والشعر الشعبي؟!
وأنا أجيب ببساطة شديدة إنني من أسرة تعتبر الحكم والإمارة شرف خدمة لأمتها..
وهذه الأسرة في الحقيقة هي من صلب شعبها.. ممزوجة عروقها بعروقه..
ذلك أنه قلما تجد فرداً من آل سعود لا يكون خالـه، أو خال والده، أو خال والدته
من إحدىالقبائل السعودية، لـهذا فلا تجد عرقاً واحداً من عروقنا لا تجري فيه دماءأمتنا وشعبها وهو الأمر
الذي نعتز به"

عن الاصاله :
" المفهوم لديّ من الأصالة هو البعد التاريخي؛
وأما المعاصرة فهي الامتداد لـهذا البعد التاريخي، وهناك اتجاهان في هذه المعاصرة:
الانقطاع عن البعد التاريخي، أو الاستفادة منه ليكون القاعدة للانطلاق،
وما أدعو إليه هو الاتجاه الثاني، أن تكون معاصرتنا امتداداً لأصالتنا . "


تكلم عن بكاء الرجال :
" أنا لا أعتبر البكاء ضعف.. هو حالة نفسية تعبر عن حزن.. عن ألم..
والرسول صلى اللـه عليه وسلّم ذكر أن العين تدمع والقلب يخشع..والدمعة
من عين الإنسان لا تعني ضعف الإنسان أبداً"


--

اتمنى اني اكون وفقت في تقديم نبذه" بسيطه" عن سمو الامير
وكـ تقديري لـ هذي الشخصيه العظيمه..
الله يطول بـ عمرك يبو بندر ويحفظك


..

ديوان خالد الفيصل



1- قصيده العمر إلى أم بندر
لك يا عنود الصيد حرفي ومعناي
..................عمري قصيده حب قدمتها لك
معك اشرقت شمس المحبه بدنياي
..................صوره قصيدي لمحهٍ من خيالك




2- أغيّر الطاروق
أغيّر الطاروق والقاف وابدع
..................وولع قلوبٍ تحس بولعنا
واسير في بستان الاشعار واقطع
..................ورد قصيدٍ مثلها ما زرعنا
واحاكي الوجدان والقلب وانزع
..................من قل قلبٍ ونّهٍ من وجعنا
واجاذب الونات في كل مطلع
..................لاهل الغرام اللي يونّون معنا
والاعب النغمات في كل مقطع
..................يطرب لها لبيب قلبٍ سمعنا
واغازل عيونٍ بالاشواق تدمع
..................وابكّي قلوبِ تجزّع لجزعنا
واشاهد عيون المحبين واجمع
..................من كل عينٍ دمعهٍ والف معنى
واصبّها في بيت الاشعار واسمع
.................صرخه فوادٍ قال معك اندفعنا


--
3- لاهنت
لاهنت يا راس الرجاجيل لاهنت
..................لاهان راسٍ في ثرى العود مدفون
والله ماحطّك بالقبر لكن آمنت
..................باللي جعل دفن المسلمين مسنون
منزلك ياعز الشرف لو تمكّنت
..................فوق النجوم اللي تعلّت على الكون
سكنت دار المجد ياشيخ واسكنت
..................شعبك معك في منزل العز ممنون
صنت العهد ياوافي العهد ما خنت
..................علمتهم وشلون الاشراف يوفون
كم ظالمٍ عاداك واعفيت واحسنت
..................واخلفت ظن جموع ناسٍ يظنون
شلت الامانه حافظٍ ماتهاونت
..................شفنابك رجالٍ على النفس يقوون
ياللي طلبه الملك بالحب زيّنت
..................عرشك بتاج قلوب شعب ٍ يحبون
لوّنت تاج الملك ماقد تلوّنت
..................ماغرتك دنياك ماصرت مفتون
بالزهد والمعروف والصبر كوّنت
..................منهاج فيصل منهج اللي يعدلون
تلفتت روس المخاليق وين انت
..................وين العظيم وعوّد الشوف مطعون
كم خافقٍ وقّف عقب ما تكفّنت
..................وكم ناظرٍ ذوّب سواداه محزون
لو شفت حال الناس عقبك تبيّنت
..................مقدار حب الناس للي يودّون
مما بقلبي قلت يابوي لاهنت
..................والا انت فوق القول مهما يقولون

--
4- سلام يافيصل

سلام يافيصل عدد ماذكرناك
..................واعداد ماقالو لك الناس مرحوم
واعداد دمع العين في يوم فرقاك
..................واعداد مافرّجت من كرب مضيوم
ان قلت ياليتي ألا ليتي فداك
..................وان قلت واعزّاه مانيب مليوم
يالعنبو من لام عينٍ تمنّاك
..................قد بدّدت شوفتك عن شوفها غيوم
وين العزى مابه عزى غير نجزاك
..................بمواصله مسعاك والدرب معلوم
ترى عزانا يوم حنّا فقدناك
..................انّا خذلنا راي من يزعم زعوم
الرايه اللي رفرفت فوق يمناك
..................ابشّرك ياشيخ ماطالها خصوم
ان كان قصد عداك تعطيل ممشاك
..................حقك علينا مانوقّف ولا يوم
نسير في دربك وناخذ سجاياك
..................ونرد من هو ضد الاسلام ملطوم
نم هاني العينين حنّا تبعناك
..................والدار فيها لابهٍ مالهم نوم
ان قاله الله مانضيّع لك مناك
..................نسجد لرب البيت في القدس ونصوم

--
5- غريب
غريب ومسافر لحالي
..................ودروب الايام تعـّابه
ادور المنزل العالي
..................ازايم الحمل وارقا به
ما احب انا المركز التالي
..................الاول اموت واحيا به
وش عاد لو الثمن غالي
..................روحي على العز وثابه
ماهمني جمع الاموالي
..................زهاد بالمال واصحابه
من فيصل اعيش بامثالي
..................ادرس وادرّس من كتابه

--
6- من بادي الوقت

من بادي الوقت وهذا طبع الايامي
..................عذبات الايام ماتمدي لياليها
حلو الليالي توارى مثل الاحلامي
..................مخطور عني عجاج الوقت يخفيها
اسري مع الهاجس اللي مابعد نامي
..................واصوّر الماضي لنفسي واسلّيها
اخالف العمر اراجع سالف اعوامي
..................وانوّخ ركاب فكري عند داعيها
تدفى على جال ضوّه بارد عظامي
..................والما يسوق بمعاليقي ويرويها
الى صفالك زمانك عل ياضامي
..................اشرب قبل لا يحوس الطين صافيها
الوقت لو زان لك ياصاحبي مادامي
..................ياسرع ماتعترض دربك بلاويها
حتى وليفك لو هيم بك هيامي
..................سيّور الايام تجنح به عواديها

--
7- ياقلب

ياقلب لاتجزع لما سووه
..................الله كريم يعدل الميله
من شال درع الصبر ماطالوه
..................الصبر مضمونه محاصيله
اللي لقينا قبلنا لاقوه
..................ياما كريم ٍ ظلم في جيله
ترى صليب الراس لو حدّوه
..................ما ينثنى لي عاله العيله
يالعنو رجل ٍ الى ضدوه
..................مايرتكي للحمل ويشيله

--
8- من بلاه الله
من بلاه الله وتصبـّر واحتسب
..................عاده المسلم على الشده صبور
اتلمّس للخوي عذر وسبب
..................لى لحقني من بعض ربعي قصور
واتحمل زلّه كحيل العرب
..................واتحاشا عضه الكلب العقور
اعشق الغالي ولاهوب الذهب
..................وانزل العالي ولاهيب القصور
في هجير العمر خاويت التعب
..................فوق رمل البيد او موج البحور
كل حي ٍ في حياته له طلب
..................ذا تهياله وهذا في دبور
لا تعجّب ماعلى الدنيا عجب
..................حكمه الرحمن خلاها تدور

--
9- وداع يا نفس

وداع يا نفس قدرها ودعاها
..................تنازعت والموت ماعنه مردود
تشبثت بحبال زخرف حياها
..................تبي نهار ٍ زود واليوم الموعود
تسللت مثل الهوا من خفاها
..................عجزت تقضّب في ذرى يابس العود
تبخرّت روحي من حياض ماها
..................يتلها نزّاع الارواح بركود
بالهون يا نزّاع روحي تراها
..................باقي عذاب ايام بيض ٍ على سود

--
10- تنشد عن الحال
تنشد عن الحال حالي كيف ما شفته
..................وانا احسب انك قبل ذا الوقت تدري به
في خاطري لك كلام ٍ مير ماقلته
..................اجنّبك مايحسّك لو حياتي به
هم ٍ جديد ٍ على الاول تحملته
..................عنك اتحمّل كبير الهم وامشي به
رحت اتمثّل بطبع ٍ لك تعلمته
..................لا صار لك غالي ٍ ليّاك تشقي به

--
11- تغنت
تغنت طيور ابها ومالت غصون الريف
..................ولبس الجبل غتره بياض ٍ من امزونه
سرت في الروابي فرحه ٍ مالها توصيف
..................تبسّم بها سلطان والخير مكنونه
تشرفت بزياره قروم العرب تشريف
..................هلا بالذي كل المراجل يرومونه
ترى العز بالجمعا ومن شذ راح ضعيف
..................ويمنا ً بلا يسرى بالاخطار مرهونه
الين اجتمع راي ٍ صويب ٍ وحد رهيف
..................ترى كل من راوز حماكم تردّونه
عملكم ظهر الهرج من غيركم تطفيف
..................يقولون لكن ماحصل مايقولونه
صدقتوا نجحتوا وارتفعتوا عن التسويف
..................عسى الله يوفقكم على ماتريدونه
احاول اجاري شاعر الملجس الحرّيف
..................وارد التحيّه مثل ماجات موزونه
اروّح عن اللي صابته شاره الهديف
..................رماه الشطير اللي تركّد على هونه
ابانصحك يا محمد تجي حزّه التصييف
..................وعلى سنّه الله كل شي ٍ تدركونه

12- الواجب اكبر

الواجب اكبر يابوخالد علينا
..................لو بعت انا روحي فلا ظنّي اوفيه
ياللي لطلاب المعونه عوينا
..................كرين نفس وغالي المال تصخيه
لى جاك شكّاي الهموم الحزينا
..................تشيل عند الهم ويروح ناسيه
انت الذي لك كل القلب يلينا
..................يجيك من جرحه عطيب ٍ وتبريه
وانت الابو وانت الاخو والظنينا
..................وانت الصديق اللي نحبه ونغليه
ان جاز طرفك ياسنادي جزينا
..................ماتهتني عيني وعينك تقاسيه
لاتشتكي ياشيخ خل الونينا
..................واللي تبي لو كان بالروح نشريه
لا والله الا يابوخالد مشينا
..................لوازمي تبقى ولازمك نقضيه

--
13- الطير ياعمي

الطير ياعمي باسميه سلطان
..................ياحيث به من شخص عمي مواري
طير السعد طير الهدد طير حوران
..................صقر الرجال اصخا بصقر الحباري
كل ٍ على جنسه رفيع ٍ وله شان
..................وانا بهم ياهل المعرفه اماري
عمي صليب الراس عمي كحيلان
..................عمي على كسب النواميس ضاري
--
14- اجهد فواده
اجهد فواده بالعزم والشجاعه
..................والقلب ماساير قوي العزايم
هذي سوات اللي طويل ٍ ذراعه
..................يمناه ماتلحق مداها القوايم
عز الرفيق وللعدو سم ساعه
..................من طلعته مع بيرق العز قايم
الحاكم الصالح كثير الوراعه
..................مايجنحه عن ماقف الحق لايم
بينه وبين المجد قرب ورضاعه
..................من عهد ابوه وجد جدّه قدايم
وبينه وبين الهون بغض وقطاعه
..................في دراهم والله ماله رسايم
وادع يا شيخ ٍ جرحنا وداعه
..................خالد ولد من صاحبته العظايم

--
15- قالوا وراه

قالوا وراه ما رثته الصحافه
..................قلت السيوف وصهوه الخيل ترثيه
عد النصف ياللي تعرف النصافه
..................ابن مساعد وش فعل في مباديه
دايم وخشم الرمح يرعف رعافه
..................الرمح يطعن به وسيفه يروّيه
وانشد ميادين الوغى كيف شافه
..................ضده من الفرسان يومه يدنّيه
الفارس اللي ما يعرف المخافه
..................الا مخافه والي العرش تثنيه
فيه الشهامه والورع والنظافه
..................نظيف عرض مايدنّس مواطيه
وفيه الكرم والجود راعي ضيافه
..................ذولا يغَدّيهم وهذا يعشيه
على العدل ميزان والظلم آفه
..................لى جاه مظلوم ٍ له الحق يعطيه
مانال ضده غير ثوب الكسافه
..................والا رفيقه بالمعزه يباريه
--
16- فاخر يابن عمي

فاخر يابن عمي ترى المجد يزهاك
..................للمجد معكم من قديم ٍ عوايد
تستاهل البيضا على الطيب يمناك
..................رايد وجدك فخر الامجاد رايد
حر ٍ شهر من ماكره يم الافلاك
..................ياوّل هدد عوّد على الناس صايد
يانجم نوّرت الجزيره بمسراك
..................دربك عداك اللوم للغير كايد
شجعت فتيان ٍ تحلا سجاياك
..................شافوك ترفع بيرق العز سايد
ومات الحسود .. وعز مثلك وشرواك
..................ربع ٍ لهم في زود سلطان زايد
ياعل من همّه"نشا الثوب"يفداك
..................واللي همومه بالبنوك الفوايد
عانقت انا اخبارك قبل طلعت ضياك
..................وتسابقت فرحات فكري قصايد
ابديتها ياخوي طرب ٍ لمسعاك
..................وارجوك تقبل ورد شعري قلايد

--
17- لا واهنيك

لا واهنيك طليق شكار يامنصور
......................مانت بمثل من يجر الرجل بهجاره
ليتي معك ناصي ٍ دار الحيا والنور
..................دار ٍ هواها عذي لو عجعج غباره
اغلي هوا الدار واغلي من سكن بالدور
..................ولا بد راعي الوطن يشتاق لدياره

--
18- يازمان العجايب
يازمان العجايب وش بعد ماظهر
..................كل ما قلت هانت جد علم ٍ جديد
ان حكينا ندمنا وان سكتنا قهر
..................بين قلب ٍ عطيب وبين راس عنيد
لو تفيد المدامع كان اسيّل نهر
..................مير كثر التوجد والدمع مايفيد
اصبر ايام واشهر واتصبّر دهر
..................وان حصلّي مناتي جيت لونّي بعيد
ارجي الله واراقب كل طالع شهر
..................يجلي الهم عني او عسى ما يزيد
يا غزال ٍ فظوح الزين عنه اشتهر
..................في عيوني ملاك ووسط قلبي وحيد
مخطي اللي يشبه وجنتك بالزهر
..................الزهر ماله رماح ٍ تصيب وتصيد
لو جحدت المحبه سقم حالي جهر
..................مير ماكل قلب ٍ ياصل اللي يريد

--
19- لمت الزمان
لمت الزمان ولايم الوقت غلطان
..................حوادث الايام من فعل اهلها
كل يغني مع زمانه على شان
..................هذا يميّلها وهذا عدلها
وانا نديم الوجد في ليل الاشجان
..................اجاذب نجوم الليالي غزلها
ياما جرحت بونّتي ليل الاحزان
..................ياما سمع منّي وياما حملها
وياما رقص مع نغمه الحب نشوان
..................ينفض عن النجمات وحشه مللها
قصيدتي رعشه خفوق ٍ ووجدان
..................صوّت بها الساري وردد مثلها
قصيدتي غنيتها روح الانسان
..................اللي معانيها بروحه صقلها
اللي غدى في شوفه العين ميزان
..................غيره الى شافته عيني خذلها
ياعايش ٍ باللو والليت خسران
..................دنياك ماتسوى حسايف زللها
يروح عمرك بين لو كان ماكان
..................والعمر ساعه ماتساوي عذلها

--
20- غرتني الايام
غرتني الايام باقبالها يوم
..................اثر النكوفه عند الايام عجله
جتني لياليها على دف وانغوم
..................اثر الليالي بالغرابيل جزله
فرحه نهار ٍ عقبها ليل وهموم
..................من يوم جذ البعد محبوب وصله
فرقا الضحى تسهل على باقي القوم
..................لكن على الخلان ماهيب سهله
ماهمنّني بعد المسافات معلوم
..................لاشك بعد القرب للصب قتله
راعي الهوى من راحه البال محروم
..................قربه وبعده نار ماينعرف له
عز الله اني في ظبي نجد مغروم
..................راعي العيون اللي مع الزين خجله
من حبهم كني من الحب مظلوم
.................ونفسي عليهم ياهل العرف وجله

--
21- حدني وقتي

حدني وقتي على شي ٍ جديد
..................السهر ماهوب من عاده عيوني
ابعدوني عن هوى بالي وسيدي
..................ومنعوا عني خطوطه ياصلوني
شطّروني عنه في دار ٍ بعيدي
..................حسبي الله كانهم منه قطعوني
صارت الفرقا لنا علم ٍ وكيدي
..................ليتهم راحوا وانا عنده نسوني
عاقني عن صاحبي سور ٍ حديدي
..................دونه البحور حراس ٍ ودوني
الرجا بك يابوخالد ياعضيدي
..................لاتخليني تراهم عذبوني

--
22- يا قديم الغوص

ياقديم الغوص في بحر الهوى
..................وش لقيت بغبّه البحر الغزير
علّم اللي جس شطه واهتوى
..................مابعد جرّب طويله والتقصير
قالوا انه من جميع امر ٍ حوى
..................فيه سمر وفيه شر وفيه خير
واسمع انه من ركب موجه دوى
..................من فعل موجه غريقه يستجير
واسمه انه من لمس شطه غوى
..................مايفرق بين بحره والغدير
واسمه انه من على تركه نوى
..................يجذبه سحره ويرجع له كسير
لو تجرح فيه قلبه واكتوى
..................مايتوب ولا يريح ويستخير
وش جمع حلوه على مرّه سوى
..................هي حلاه الحب في الكاس المرير
رغبوني لين قلبي له هوى
..................وانذروني لين صدّقت النذير
خوفوني منه والقلب التوى
..................راغب ٍ ومعيف والخايف يحير
هو صحيح ان الهوى ماله دوى
..................خبّر اللي جاك عاني يستشير

--
23- هلّت
هلّت دموع السما عند الوداع
..................وارسلت غيومها شوق وحنين
مدلي يمناه وانهى الاجتماع
..................والهنا تبدّل بدمع ٍ حزين
قال ودّع مايفيد الامتناع
..................الشقا مقسوم مير الله يعين
رمشه الفتّاك وعيون ٍ وساع
..................صوّرو بالقلب له رسم ٍ حسين
شوفي له ساعه ٍ عندي متاع
..................متعه الدنيا نظر عين ٍ لعين
لى ذكرت اللي حدر هاك القناع
..................مبسمه والخد مع نور الجبين
لو بغيت الصبر قلبي ماستطاع
..................ياسعد ياكود فقدان الظنين
كل مالاح بسما حبّي شعاع
..................اظلمت دنياي واشتد الونين
يا حسايف وقتنا والعمر ضاع
..................نجتمع يومين والفرقا سنين

--
24- يا عل قلب

ياعل قلب ماشكا الحب والتاع
..................تنهار من فوقه محاني ضلوعه
ياما نهيت القلب لاشك ماطاع
..................ماطاع يدله والليالي تلوعه
اثر المولّع دمعته تجرع القاع
..................والى ذكر مافات هلّت دموعه
يفز قلبي تالي الليل مرتاع
..................اخاف تبعد عن ربوعي ربوعه
الموت كان العرف عقب البطا ضاع
..................والمنتحي يا سعود صعب ٍ رجوعه
في غير شوف العين مانيب طمّاع
..................حقّه علي امشي بدرب المطوعه
ابو عيون ٍ رمشها سود ووساع
..................في ذبحها العاشق فتون وبتوعه

--
25- قريت خطّك
قريت خطّك بالوفا عشر مرات
..................في كل مرّه تنثر العين ماها
ذكّرتني هاك الليال الجميلات
..................لو كان قلبي ذاكر ٍ مانساها
من عقبكم ماعاد للعيش لذّات
..................مالتذ في دنيا مخالف هواها
اليوم انا مثلك جداي التنهات
..................عيني تهل دموعها من عناها
هايم بعيد الدار سهران مابات
..................اتبع هواجيس ٍ بعيد ٍ مداها
نار ٍ تلهّب بين الاضلاع زافات
..................نار ٍ لحبت بالجوف عالي سناها
مالي عن المقسوم مافيه مشكات
..................بليت بلوى سم حالي بلاها
الله يبدّل حالتي في المقبلات
..................مايقطع لنفس المشقّي رجاها
ارض الجزيره علّها للمسرات
..................القلب وعيوني وروحي فداها

--
26- انا شاقني
انا شاقني بالحيل منظر حمام شهار
..................صلاه العصر يوم انحدر باسفل الوادي
لحظني شبكني ثم قفى وانا محتار
..................دفعني غرامي له على غير معتادي
تطاير حمام الشوق والقلب مني طار
..................تلاعب جناحه بالهوا لعب بفوادي
انا امّا حصل لي ياسعد يمهم مسيار
..................تراهم سبب ذبحي لى جاك نشادي

--
27- هني فلانهني فلان يوم مناه جاله
..................خشيف الريم في قلبه يرومه
تهيّاله مراده بالسهاله
..................ولا احد ٍ في غرامه بي يلومه
وبعض الناس واعزّا لحاله
..................سهير الطرف مجزيته همومه
عسى اللي في الهوى غيره سعاله
..................مريض الروح يقضي له لزومه
الا ياعين وش كثر البكاله
..................عليل وراحه القلب معدومه
الى منّه طراله ما مضاله
..................اسير الحب مايفرح بيومه

--
28- سلام
سلام ياساكن ٍ قروى
..................لا يابعد من سكن فيها
من قربك الكبد ماتروى
..................والا ترى البعد يظميها
ياصاحبي ما اقدر السلوى
..................عشرتك مانيب ناسيها
قلبي الى شاف من يهوى
..................عندي من اسعد لياليها
اثر المحبه من البلوى
..................مايرقد الليل راعيها
لو انصح العين ماتقوى
..................تبكي على شوف غاليها
ماقوى العزى عنك وش دعوى
..................باوّل حياتي وتاليها
شكواي للي له الشكوى
..................رب ٍ له الحال شاكيها

--
29- يا ولد عوّد

يا ولد عوّد لاهاليك ماتقوى
..................لوعه الفرقا سطت فيك مسطاها
لاتهقوى ما بالابعاد لك سلوى
..................المحبه ماسلم من شرب ماها
من بلى مثلك فلا يبرى البلوى
..................كود شوفته من بالاوطان خلاها
الذي بك يا ولد بالذي تهقوى
..................ياولد عوّد ترى شفاك بشفاها


--
30- سافر
سافر عسى ربي يحرسك وياقاك
..................هذا البخت عزّاه وش في يديني
ياشين باكر ياحبيبي بليّاك
..................لى جا وعدك اللي بوقته تجيني
لى قمت ادوّج في مداهيل ماطاك
..................ياما جرى بشهار بينك وبيني
هذا وهو توّك تطرّي ابممشاك
..................وشلون لى قفيت يانور عيني
ياشيب عينك ياهوى البال ماشقاك
..................كانك مثل ما ابيك ياسمر تبيني


اتمنى يعجبكم هالديوون الشاعر دايم السيف
وسامحوني على التقصير

وان شاء الله راح تكون لي رجعه مع قصاائده وابدااعه

ابداع هالقصايد وناقل القصايد

احس اني طمرة طمره قويه هع


يسلمو هالابداع ولو اني مشرف لثبته على طول

ولا عدمناكـ